Svo mælti Zarathustra

Í nótt var heilum klukkutíma rænt!  Ég verð að viðurkenna að mér finnst þetta eiginlega bara kjánalegt kerfi, að vera að breyta klukkunni svona fram og til baka.  Þetta á víst að vera svo sniðugt.  En það er óþægilegt að vakna við það að klukkan er klukkutíma “meira” en hún “ætti” að vera.

Danir (eins og margir fleiri) eru hræddir við salmónellu (ekkert skrýtið við það svo sem) sem sést meðal annars á því að á umbúðum utan um kjúkling standa alltaf skrifaðar nánast með stríðsletri leiðbeiningar um það hvernig skuli matreiða kvikindið án þess að fara sér að voða.  En svo getur maður keypt danskan kjúkling (sem hefur þá trúlega verið slátrað á dönsku) sem er merktur skýrt og greinilega “Salmonella-fri”.  Ég er að rífa í mig einn svoleiðis núna og hann er bara góður.  Það er ágætt að vita það að salmonellan hafi fengið frí en merkilegt þykir mér að það virðist bara vera gert í Danmörku…

Það er eitt sem má ekki gleyma að gera reglulega þegar maður býr í Köben og það er að fá sér göngutúr um miðbæinn.  Það var orðið langt síðan ég fór síðast af stað án þess að vera á leiðinni eitthvert sérstakt og hafa engan tíma til að þvælast um að vild.  Svæðið var svo sem ekkert öðruvísi núna en síðast þegar ég fór en þetta er samt alltaf gaman.

Það er að segja ekki fyrir mig, eða raunar neinn sem ég þekki, en það er hópur fólks á mjög háum launum hjá íslenska ríkinu (og þau fara stöðugt hækkandi, ég spái því að þau hækki um helming 13. maí) sem er alveg að komast í sumarfrí frá vinnunni sinni og þarf ekki að mæta í hana aftur fyrr en í október (eða þar um bil)! Og svo er sagt að kennarar hafi langt sumarfrí! Og svo munu þau ekki einu sinni sitja aðgerðalaus (ef það væri nú svo gott…) heldur æða um allt (á fullum launum) lofandi upp í ermar, skálmar, rassvasa, brjóstvasa, innanávasa, hálsmál og allt mögulegt annað sem hægt er að stinga meiningar- og merkingarlausum loforðum í til þess að sannfæra grunnhyggna vinnuveitendur sína um að þau eigi að fá annan fjögurra ára samning því annars fari allt til andskotans og Íslendingar endi á að þurfa að rifja upp hvernig á að byggja torfbæi og hvar sé hægt að nálgast mó. Og til að krydda allt saman er svo boðið upp á sandkassamálflutning um að ef þessi þarna komist aftur að muni enginn fá neitt að borða því hann/hún sé svo vondur/vond. Og þessu trúir fólk…

Mikið er það nú alltaf skemmtilegt þegar manni er boðið í mat:)