Það er einn spammari sem er búinn að finna bloggið mitt og mokar hér daglega inn nokkrum kílóum af kæfu. Akismet spam filter finnst kæfa góð svo þetta er ekkert vandamál, ég er ekkert of góður til a smella daglega á “Empty Spam”. En nafnið sem þessi spammari gefur upp er í hæsta máta undarlegt. Hvernig dettur spammara sem mokar inn lélegri ensku í hug að kynna sig sem “Elektrische Zahnbuerste”??? Eru rafmagnstannburstar orðnir svo háþróaðir að þeir eru komnir í auglýsingabransann?
Mér er spurn…
Og “ikke et øjeblik for tidligt” eins og danskurinn segir…
WordPress ætlar að taka allt heila klabbið niður eftir nokkra tíma, nú er bara að vona að það verði allt komið í lag þegar þeir klára að fikta…
Það er búin að vera einhver ævintýraleg vitleysa í gangi síðustu daga. Svo virðist sem nýjar færslur verði ekki að raunverulegum síðum (sem er nauðsynlegt svo hægt sé að kommenta) en nú sjáum við hvort eitthvað hefur breyst…
Það tilkynnist hér með að kommentin við færsluna frá í fyrradag eru komin út í tæknilegar rökræður (þó ekki rifrildi enn sem komið er) um ágæti hinna ýmsu mismunandi stýrikerfa sem byggð eru á Unix. Þeim sem ekki skoruðu að minnsta kosti 80% á nördaprófinu sem hér var birt fyrir nokkrum vikum er eindregið ráðlagt að fara varlega í lestri þeirra kommenta þar sem þau geta geislað frá sér svo gríðarlegum leiðindum að sársauki hljótist af ef lesandinn er ekki varinn af nægilega þykkri nördabrynju. Ekki láta blekkjast af þeirri undarlegu staðreynd að mestu nördum þyki þessar rökræður skemmtilegar, þeir eru bara svona skrýtnir.
Geislavarnanefnd.
Þegar kommentað er við færslur á þessari síðu þarf að gefa upp email svo kerfið geti áttað sig á því hvort það er nýr “kommentari” á ferð. Komment frá fólki sem ekki hefur kommentað hér áður (þ.e. frá því ég flutti síðuna) bíða eftir að ég samþykki þau, þegar ég er búinn að samþykkja eitt komment getur sá sem það átti kommentað óhindrað upp frá því. Sömuleiðis eru komment sem hafa linka látin bíða eftir að ég samþykki þau. Það er því ekkert skrítið þótt fyrsta kommentið birtist ekki strax.
En þetta kerfi er alveg svakalega sniðugt! Ég get bætt við eins mörgum aukasíðum og ég vil (eins og gestabók), sett merkimiða á hverja færslu fyrir sig (svo ef einhver vill lesa allt sem ég hef skrifað um t.d. trompetspil verður fljótlega hægt að nálgast það allt á einum stað) og kerfið heldur sjálft utan um alla statistík (heimsóknir á síðuna og slíkt). Og það er engin þörf á að tengja utanaðkomandi forrit eins og kommentakerfi inn í þetta með tilheyrandi veseni og lúsaleit út um allt til að finna eina litla prentvillu í HTML kóda því það er allt innbyggt í kerfið.
Mér líst strax miklu betur á þetta kerfi en bloggerinn, það eru miklu fleiri möguleikar og hægt að hafa síðuna eins stóra eða litla í sniðum og hver vill. Og svo er (vonandi) í lagi með kommentakerfið…
Það er að segja: Ég er búinn að starta annarri bloggsíðu og ætla að nota hana framvegis. Ég fékk einfaldlega nóg af þessu kommentabrasi svo þegar ég sá nýju síðuna hennar Hildigunnar ákvað ég að prófa hvort ég fyndi ekki eitthvað sem mér litist á hjá sama síðugerðarmanni (húrra fyrir síðugerðarmanninum!). Því er það svo að gamla síðan (á blogspot) verður ekki uppfærð frekar en henni verður þó haldið við ef einhvern skyldi fýsa að lesa yfir gömul komment (sem ég gat ekki fært á milli). Í því skyni verður linkað á hana frá nýju síðunni (og til baka). En nýja síðan er hér. Því gæti verið góð hugmynd að uppfæra linka á mig. Svo URLið sjáist örugglega líka þá er það hér: http://jongudm.wordpress.com
Þetta var eitthvað það alerfiðasta sem ég hef nokkurn tíma lent í! Hellirigning alla æfinguna og hlaupið á fullu (það fannst mér a.m.k.;)) allan tímann. Ég var hættur að geta hitt boltann undir það síðasta! Usss… En það verður víst að viðurkennast að jafnvel á meðan nóg var af úthaldinu sást það greinilega að það er ansi langt síðan ég spilaði fótbolta af einhverri alvöru!
Það er víst rétt að það komi fram að ég get nánast ekkert kommentað, ég veit ekki hvort öðrum gengur eitthvað betur eða hvort sumir eru bara þrjóskari en ég:) En það er semsagt þessvegna sem ekki kemur endilega svar við öllum kommentunum sem svo mikið var haft fyrir því að koma á framfæri, ekki það að ég nenni ekki að svara;)
Það er ekki einleikið hvað þetta kommentakerfi er til mikilla vandræða þessa stundina. Ég er búinn að eyða heilmiklum tíma í allskonar debug vitleysu á síðunni hjá enetation og allt kemur fyrir ekki. Eru einhverjir fleiri í svona vandræðum með þetta kerfi eða er það bara að hrekkja mig? Ég gerði tvær tilraunir á stuttum tíma til að kommenta á síðustu færslu, þær sjást í talningunni en ekkert birtist…
Ég veit ekki hversu margir hafa tekið eftir því að kommentakerfið mitt er enn einu sinni gengið af göflunum (hvað það var að vilja gangandi á göfflum veit ég ekki en allt um það) og neitar nú alfarið að telja kommentin sem í það eru skrifuð. Þegar þetta er ritað eru þrjú komment við síðustu færslu en kerfið sýnir ekki eitt einasta (fyrr en maður gáir). Enn ergilegra er það að það virðist gríðarlega erfitt að fá hvert komment fyrir sig til að fara rétta boðleið í kerfinu, sem dæmi má nefna að kommentið mitt við síðustu færslu kostaði fjórar tilraunir. Þetta virðist alltaf loða við þetta enetation kerfi en ég verð að viðurkenna að bæði nenni ég ekki að standa í því að skipta um og svo hef ég enga trú á því að það sé neitt minna vesen á öðrum kerfum, bara öðruvísi vesen. Svona er það alltaf með þetta internet. Drasl!
Kommentakerfið mitt hefur ákveðið að talan 5 (fimm) sé ekki til, og hér eftir verði talið 1,2,3,4,6,7,8,9,… A.m.k. ef marka má síðustu tvær færslur. Það verður forvitnilegt að sjá hvort það vill líka hlaupa yfir þær tölur sem innihalda 5 og þær tölur sem 5 gengur upp í. Eins og í þeim merka leik Búmm! Kannski kerfið sé að spila 5Búmm! við einhvern, hvað veit ég svo sem?
Nú ættu komment í öllu falli bara að tengjast þeirri færslu sem þau eru skrifuð við. Til þess að sjá möguleikann á því að kommenta þarf að nota tímalinkinn fyrir neðan færsluna, þá kemur upp síða með færslunni einni og þar fyrir neðan sést kommentalinkurinn. Ég er enn að leita að rétta staðnum fyrir kódann en hann finnst örugglega að lokum. En þessar tilfæringar ollu því að aftur hurfu öll gömul komment.
Annars er það helst í fréttum að ég kannast ekkert við þann mann sem horfir út úr speglinum á baðherberginu. Þessi undarlega spegilmynd kemur til af því að áðan var ég heima hjá Sigga og Sigrúnu í mat. Eftir mat var horft á sjónvarp en þar gaf að líta einn af þessum merkilegu “makeover” þáttum (þó ekki Extreme, þessi virtist næstum því normal, engar skurðaðgerðir). Ég man eftir að hafa velt upp þeirri spurningu hvað yrði gert við mig ef ég færi í svona þátt. Skipti þá engum togum að ráðist var á minn úfna og krullaða haus með sléttujárni (ég vissi ekki einusinni að slík apparöt væru til) með þeim afleiðingum að nú er ég slétthærður!! Ekki er þó gert ráð fyrir að þetta ástand verði langlíft því mitt hár hefur alltaf sótt sjálfkrafa í hámarks óreiðu. Það verður forvitnilegt að vita hvort mér verður hleypt inn á kóræfingu annað kvöld ef hárið verður ennþá í þessu annarlega (og trúlega afar óstöðuga) ástandi!
Bannsett kerfið veitir mótspyrnu, nú koma ný komment á allar færslur í stað þess að tengjast bara þeirri sem þau eru skrifuð við????!!!??!??!????!???!???!?!
Og hvernig færir maður orðið comment (og jafnvel breytir því)?
Oss er ekki skemmt…
Eg hefi unnið frækinn sigur á treggáfuðu tölvukerfi og sett upp hið merka kommentakerfi enetation. Það hefur að vísu þær aukaverkanir að öll þau vísdómsorð sem rituð voru í gamla kerfið verða að hverfa því til þess að geta sýnt þau þyrftu bæði blogger og enetation kommentin að sjást. Hætt er við að það ylli ruglingsfalli R(F) er stefndi hratt á óendanlegt með stækkandi F þar sem F er fjöldi færslna á síðunni. Ekki vijum við það (divergent föll eru vond) og því fara gömlu kommentin huldu höfði. Rísi sérstakar aðstæður get eg þó beitt mínu óskoraða valdi sem vefmeistari síðu þessarar til að birta þau aftur telji eg góðar og gildar ástæður til.
Gerði aðra tilraun til að koma enetation í gagnið, nú kemur í ljós hvort það tókst. Annars verð ég að grípa til róttækra ráðstafana…
Ég held ég hafi aldrei lesið bloggsíðu þar sem var hvergi að finna færslu á borð við “veit einhver hvernig maður setur upp [setjið inn kommentakerfi að eigin vali]?” Nú er komið að mér, ég reyndi að setja upp enetation en það virtist ekki virka í fyrstu tilraun, næsta tilraun verður gerð við fyrsta tækifæri. En nú verður farið í bæinn því Guðrún básúna og Jonas eru að koma í heimsókn í siðmenninguna (frá Svíþjóð sko (híhí)). Raunar skil ég hvorki upp né niður í ástæðunni, persónulega myndi ég frekar fara á milli landa til að sleppa frá Sálartónleikum en til að fara og hlusta á þá, en fólk verður að fá að hafa sinn smekk. Svo verður farið út að borða með fullt af Íslendingum í kvöld. Mikið stuð!
ps. Ég bara varð að gera smá grín að Svíum (ekkert persónlegt Jonas!) fyrst ég er nú staddur í Danmörku þar sem Danir og Svíar hafa barist svo oft að það er varla nokkur leið að hafa tölu á því!
